శ్రద్ధ - అంగీరసుడు - 4

https://www.facebook.com/vallury.sarma/posts/524785904225494

2/05/2013 సప్తర్షులు - ఋషి పత్నులు

ఇంతకీ అంగీరసుని భార్య, సంతానం ఎవరు? దీనికి ఒక సమాధానం చెప్పడం కష్టం.ఇక్కడే పురాణాలను వేదాలను గురించిన అవగాహన కావాలి. మహాభారతం ఆరణ్యపర్వంలో మార్కండేయుడు అంగీరసుణ్ణి గురించి చెబుతూ ఆయన భార్య శుభ అంటాడు. మనం శ్రద్ధ అనిచెప్పుకున్నాం. ఇంటర్నెట్లో వెదికితే ఒకొకచోట ఒకొకపేరు కనుపిస్తుంది. అంగీరసుని పై వ్యాసం చదివితే, వికి పీడియా వ్యాస రచయితకి విషయంఅర్థం కాలేదు అని స్పష్టంగా తెలుస్తుంది. ఇక పురాణాలలో వేరు వేరు వాటిలో వేరువేరు పేర్లు కనిపిస్తాయి. మనంచెప్పుకున్న శ్రద్ధ, అంగీరస మిథునం ఈ కల్పములో స్వాయంభువ మన్వంతరంలోనిది. శివపురాణం ప్రకారం అంగీరసుని భార్య సురూప. చాక్షుస మన్వంతరం లోని దక్షప్రజాపతి కుమార్తె స్మృతి భర్త అంగీరసుడే. తరువాత కొంతకాలానికి అంగీరసుడే దక్షప్రజాపతి కుమార్తెలే ఐన స్వధా, సతి అనేవారిని పెళ్ళిచేసుకున్నాడని ఉన్నది. అంగీరసుని వంశజులందరినీ అంగీరసులుగా వ్యవహరించి ఉండవచ్చును.

అంగీరసుడు, ఇతర ఋషులు ఎంతకాలంజీవించారు? వారికి ఎందరు పత్నులు, సంతానం? ఇతర సంబంధాలు ఎందుకు కలిగినవి? అనే అనుమానం రావచ్చు.దీనికి అర్థంచేసుకోవడానికి లోకములు, సృష్టి గురించి పురాణములు వేదములు ఎల్లాచెప్పుతున్నాయో అవగాహన కావాలి. అంగీరసుని వంటి మహర్షులు బ్రహ్మ పుత్రులు. దేవతలే. వారే ప్రజాపతులు. వారి జీవితకాలం కల్పాంతం వరకూ ఉంటుంది. వారు ప్రతి మన్వంతరంలో ఆయా ప్రజాపతుల కుమార్తెలను వివాహంచేసుకొని భూమిపై సృష్టిని కొనసాగిస్తారు.ఇక్కడ కాలమానం వారికి క్షణాలలో జరిగిపోతుంది. వారు దివ్యరూపాలతో తమలోకానికి వెళ్ళిపోతారు. మనకి భూమిపై వేల సంవత్సరాలు వారికి క్షణాలు. భూమిపై వారున్న కాలం, వారు ధరించిన శరీరాలు,సంసార బంధాలు వారికి లీలా వినోదమే, జగన్నాటకములోని దృశ్యాలే.

ఈ ఇతిహాస పురాణాలు మూలాలతో సహా చదివినవారు భారతదేశంలో ఎందరుంటారు? ఉన్నా వారు ఇంగ్ళీషులో వివరణ వ్రాయలేరు. వీటిని ఒకశతాబ్దంక్రితం ఇంగ్లీషులో అనువదించినది ఆంగ్లేయులు. వారికి వేద, పురాణాల అంతరంగం అర్థంకాలేదు. ఒకరకమైన వ్యంగ్యంతోకూడి ఉంటుంది వారి అనువాదం. ఒక ఉదాహరణ విల్కిన్స్ అనే ఆయన 1900 లో వ్రాసిన పుస్తకం.Hindu Mythology, Vedic and Puranic, by W.J. Wilkins. ఆయన వేద, పురాణాలలోని ఋషులగురించి వ్రాసిన అధ్యాయం పేరు Part III - Inferior Deities, Chapter 1, The Divine Rishis : పాపం A superior English man writing about inferior gods and saints of the inferior natives! ఇప్పటికీ అనేక ఇండాలజిస్టులది అదేబాట.
అంగీరస మహర్షి ప్రసక్తి బౌద్ధ వాఙ్మయం లో కనుపిస్తుంది. గౌతమ బుద్ధుడు గౌతమగోత్రజుడు. అంగీరస, ఆయాస్య, గౌతములు ఋషులు. బౌద్ధుల త్రిపిటకాలలో ఒకటైన వినయ పిటకలోబుద్ధుని అభిప్రాయం కనుపిస్తుంది. ఆయన ఉద్దేశ్యంలో వేదాలలో అత్రి, విశ్వామిత్ర , వామదేవ, అంగీరస, జమదగ్ని,భరద్వాజ, వశిష్ఠ,కశ్యప, భృగు మహర్షులు ద్రష్టలైన మంత్రములు ప్రమాణములు. తరువాత చేర్చిన కొన్నిభాగములు ఆయన ప్రమాణంగా స్వీకరించలేదు. దీనిని బట్టి ఆయన వేదాలను నిరసించాడనే అభిప్రాయం తప్పని తెలిసినది. ఆయన నిరసించినది స్వర్గము, స్వప్రయోజనాలకొరకు చేసే కర్మకాండ.
వేదాలలో అంగీరసుడు అనేక ఋగ్వేద మంత్రాలకు, అధర్వణవేద, శుక్లయజుర్వేద మంత్రాలకు ద్రష్ట. ఏ ఋషులు ఏకాలంవారు అనే విషయాలు కూడా తెలియదు. మన సాంప్రదాయం ప్రకారం అరణ్యము వంటి వేదమును ఒక క్రమములో నాలుగు వేదములుగా విభజించి ఉద్యానంలా చేసినవాడు వేదవ్యాసుడు. ఈయన ద్వాపరంలో శ్రీకృష్ణుని కాలంవాడు. వేదాలు అంతకు యుగాల ముందువి. ప్రతి మన్వంతరంలోనూ ప్రజాపతులు ఉన్నారు. అంగీరసుని కూడా ఒక ప్రజాపతిగా పరిగణిస్తారు. ప్రత్యాంగిరా (దేవి) మంత్రములు [ఋక్కులు (ఋచాః)]35 ని అంగీరసుని పుత్రికలుగా తలుస్తారు. ఇక్కడ విశేషము ఒకటి ఉన్నది. దేవత అంటే వేదములో మంత్రమే. విల్కిన్స్ గారి పుస్తకంలో అంగీరసుని గుర్రించి వ్రాస్తూ "His so-called daughters, the Pratyangirasa Bichas, are thirty-five verses addressed to presiding divinities." ఈ బిచాస్ అన్న అచ్చుతప్పు వందలాది వెబ్సైట్లలో యథాతథంగా ఉన్నది. ఋచాః అని ఉండాలి. "so called" అన్నప్రయోగం మంత్రస్వరూపములే ఆదేవతలు అనితెలియక పోవడంవలన వచ్చినది. (ఉదా: ఓం నమః శివాయ, అనేమంత్రాన్ని అమ్మవారుగాను (శివా), దాని అర్థాన్ని శివతత్త్వంగానూ భావించవచ్చు. వాగర్థా అంటే అదే.)
సప్తర్షులు,వారి భార్యలు, సంతానాలు సూర్య చంద్రులు, గ్రహములు, నక్షత్రములు, ధ్రువుని వంటి హరిభక్తులు వీనికి సంబంధించిన గాథలకు జ్యోతిశ్శాస్త్రానికి, వైదిక ఖగోళ శాస్త్రానికి (Vedic Cosmology)కి చాలా సంబంధాలున్నాయి. మనం అంగీరసుని కుమార్తెలు రాకా, సినీవాలి గురించిచెప్పుకున్నాము.కొన్ని పురాణాలు ఇంకో ఇద్దరు కుమార్తెలు అనుమతి, కుహూ గురించి చెబుతాయి. ఇవన్నీ పౌర్ణమి అమావాస్య, వాని ప్రక్క తిథులు. ఈ పేర్లన్నిటిలో సృష్టి రహస్యం దాగి ఉంది. ఇవి పరిశోధించవలసిన విషయాలు. విష్ణు పురాణం, భాగవత పురాణం ఇంకా అనేక పురాణాలలో ఈ విషయాలు ఉన్నాయి.